MI SIEMTHAR NAWK RAWH

Doh is C                                  Buonglienkung

Hi kan zina le kan khuolna rama hin chu,

Ka thla reng a ngam thei nawh Lalpa mi thuoi rawh;

Thim lal thuneina hnuoia ka pil zo hma hin,

Aw van Thlarau Thienghlim, mi hung kan thar rawh.

Aw ka lawmna Lalpa, iengkima ka iengkim,

Thina varuom lampui hraw chu mi phal lul naw;

Hnena puonzar khaia i hnung zui dingin,

Ka hringnun hluotu hi aw mi hne pek rawh.

Hnuoi lungngaina le buoina han’n mi chim sienkhawm,

Van Lal Immanuel nangin mi thuoi pei la;

Suol thuneina hnuoia intang santu dingin,

Lalpa ka hringna hi mi siemthar nawk rawh.

Mihriem felna le theimna’n i rawng ka bawl a,

Sienkhawm hmangaina danah a tling zo si nawh;

Aw nang Van Thlarau Thienghlim i thang si naw chun,

Mihriem hi iengmalo el kan ni si a.