JOSEPH INPUONGNA

Doh is D                                  H P Runremthang

Teina Kannan rama tampui tlak lai khan,

Sil-le-fen, fak ding tha reng a um si nawh;

Jacob sung le kuohai lung a zing ngei ie,

Sienkhawm an suopui le an lo intawng tah

Inpuong faina hi malsawmna bul a nih,

I unau, rawngbawlpui hai I hmangai am?

I tawngbau suoktin hi mitin damna di’n,

Chi a saw hmangaina thang ni ngei raw seh.

“In unaupa, Josef kha ka nih an nawh,

Mihai hringna sanhimtu ding ka lo nih;

Lungngai naw ro’ tia hmangaitawngbau chun,

Sungkuo nun hlimna le lawmna an tlun tah.

Inremna le hmangaina’n ro rel in la,

Ei ram ei hnam, kohran, ngir tha nawk a ta;

Tuktin par hai iengin vulmawi in suoin,

Lalpa hmangai ropui zie hril tang ei tih.

THENAWNA RAM KA NGAI

Doh is G                                  Buonglienkung

Ka khuolzinna ram hnuoi tawngsephur hi,

Ka suoksan ni la tlung ngei a ta;

Hmangai lungzur ka lo the ta hai leh,

Van khawpuia in tuok kan tih.

Aw ka ngai the nawna ram inhawi chu,

Hmangai lungzurhai ser ang kimna ram chu;

Aw a van hawi awm ngai, chu khawpui mawi chu,

Ei chatuon Lalpa envel ram ning a ta,

A chun Van Angel hai leh leng hmun tang ei ta,

Hnuoi ram nun hi ngai lovin, leng tang ei tih.

Ei sin inrimna hai ei zo pha chun,

Hmangaihai leh Zion ram mawia;

Hallo teiin ei la leng hmun ding si,

Aw ka nghakhla chu hun ding chu.

Puonvar sila leng intlansa hai chun,

Hnuoi rinumna Ram ngai ta lovin;

Van Beramte hnena chu inpakin,

Halleluijah ti’n zai an rem.

HLIMIN LAN TUOK EI TIH

Doh is  A                                 Lalnuntluong Faiheng

Hnuoi hringnun thina ram hi ka suoksan pha,

Chun le zuo lo famthahai kha;

A chun hlimin la’n tuok khawm kan ta,

Hlimtakin Lalpa chu inpak kan tih.

Khawpui mawi chatuon ram ei tluong pha chun,

Thi le in the ti ta lovin;

Lungdit fe hmasahai le chawnban suiin,

Hlimtakin chatuonin leng tang ei tih.

Chungtieng Van inrumna khel ram ropui chu,

Lungdithai kimna hmun a nih;

Hi hnuoi nghawkum hi ka suoksan pha,

A chun ka hnuoi mitthli hul tang a tih.

Ei nghakhla chatuon khawpui ei tlung pha,

Beramte hmel var hmu’ng ei ta;

Lusun, tapna hai bo tang a ta,

Hnung ngai ta lovin hnag leng tang ei tih.

ANGEL VENG KHAWPUI

Doh is _                       Thlangzarlien

Kan zinna hnuoi ram hi, Ka suoksan hunpha chun,

Beramte hmel ditum, Lawmin hmu tang ka tih;
Jordan varal rammawi,

Aw tlungkar ka nghakhla ngei.

(Aw) Angel vêng khawpui a chun

Zai inawi ka tih ka Sandamtu;

(Aw) Angel vêng khawpui a chun,

Zai inawi kka tih ka Sandamtu.

Ringna mitin ka thlir, Angel vârhai lêngna,

Tlantu ropui tak chu, Hlimtakin an inpâk;
Chu hmun chu maw lo nih,

Aw tlungkâr ka nghakhla ngei.

Khawpui mawi taka chun, Ri mawi ropui an rem,
An zai hlamwi rem chu A thienghlim ie tiin;
Chu hmun chu maw lo nih,

Aw tlungkar ka nghak hla ngei.

SERAFIMHAI HLAMAWI

Doh is Eb                    Buonglienkung

Vana khin hril la ning a tim?

Lalpa ropuina hi?

Ropui taka hril la ning a tih,

Chatuon khawmin tawp naw ni.

Iengkim thawthei Pathien chun,
Chatuonin ro a rêl ie;
Vân Angel Serafimhai hlamawi chu,
Sûn le zân reng a chawl naw; (a chawl naw)
A thienghlim ie, ropuina êngmawi tin zam vêl;
Chatuona nei tlak I ni ie; (Lalpa)
Halleluiah, ‘Athienghlim ie’ tiin.

Rauthlain ka hang fang vêl ie,

Chung tieng ramropui chu;

Sandam nauhai ram a lo nih ie,

Aw, a varopui ngei de.

Vân Angel Serafimhai chun,

Zion hlamawi an rem;

Vân Beramte chu a thienghlim ie,

Rorelna chu chang raw se.

Chu hmun mawi le inhawi a chun,

Berâmte an chawimawi;

Vân khawpui laituol a nghawr vêl ie,

Seraphim hai zai ri chu.

PATHIEN THLAMUONGNA

Doh is Eb                                Buonglienkung

Pathien thlamuongna danglam tak el chu,

Chungtieng Pa a inthawkin a hung tlung a;

Khawvel mihai hriet phaklo nun ngei chu,

Ringna thla chu zarin aw ka vuong sang pei ie.

Pathien thlamuongna, chatuona thlamuongna;

(Aw) Khawvel in a pek theilo;

Chatuona thlamuongna danglam tak chu,

Krista’n a mi pek tah.

Lungrila lawmna thar chu ka nei tah,

Khawvelin a pek theilo nun chu a nih;

Krista hmangaina Ropuitak el chu,

Chatuon lawmna thar mi siem pektu a ni si.

Tuhin famkimlo silfen chu neiin,

Hi ka hringna hin hnuoi ram a la hluo a;

Ka huoi hringna hin thlan a khel pha leh,

Chatuona thlamuongna famkim changtang ka tih.

MI NGAIDAM RAWH LALPA

Doh is G                      H P Runremthang

Lalpa I Bible hril lawk angin,

I nauhai laia khawhlona lei hin;

Kan suksiet zo tah I hming ropui,

Mi ngaidam rawh, mi ngaidam lul rawh.

Aw Lalpa, thisena’n tlan I nau,

I hming chawimawia suk ropui ding hin;

Chawimawi a nekin ka sukmuolpho ta che,

Mi ngaidam rawh Lalpa, mi ngaidam rawh.

Ringnaa mi huoisen fe ta ha’n,

An lungkham thei nawh hnungsawn hnuoi rinum hi;

Ram ṭha nawk zuol ngaia inrum an nih,

An ta di’n ‘Pa’ni khawm i’n zak si nawh.

Khawvel ropuina hliekhu ding le,

I hming ropui chawimawi a nina di’n;

I thilthawtheina ropui tak chu,

Hung puong suok nawk ta la, Aw Lalpa.

Lalpa I malsawmna ka dawng pohai,

Ka theina pohai, Lalpa ropuina di’n;

Ka lungril ngaituona po po leh,          

Ka hung inhlan Lalpa, I ropuina di’n.

KA LUNGAWINA

Doh is C                      Buonglienkung

Damlai khuolzinna rama hin,

Duthu aiang ka sam hlaka;

Sienkhawm hlimna rêng ka hmu nawh,

Ka Lal Krista kuoma chau naw chu.

                         

Ka lungawina Krista anih,

Ka mawina le ka thienghlimna;

Thiem ka changna a nih Lalpa chu,

(Halleluiah) Halleluiah (4)

Lalpa’n thilṭha a mi tiem tah,

Chu ngei chu ka hlimna a nih;

Khawvelin a pêk ang ni lo.

Chatuona lungawina kim a nih.

Lungawina Krista ka nei hi,

Hnuoi rothilhai nêkin a hlu;

Khawvêl mihai hmu phak loin,

Ringna thlain a mi vuongkai pui.

ISU LE CHUN

Doh is E                                              T. Romana

Chatuon ramhlun chu ei pan mêk,

Buoina sûmpui huolvel kâr ah;

Lawm le lungngai ni ei tiem nawk hlak,

Buoina khêl rammawi ei tlung hma hin chu.

Isu (Isu naw chun Lal Isu naw chun) naw chun,

Khawvêl a hin hring hi iengmalo el a nih;

Khawvêl varna khawm teplo a nih,

Sienkhawm Isu le chun iengkim thaw thei a nih.

Harsat tuokni’n a mi ṭhangpui,

Thina tlung khawmin a mi hnem;

Tlaksam khawmin mi thlathlam naw nih,

Isu le chun iengkim thaw thei a nih.

Theichang kûng hai parvul nawin,

Lo in fâk ding insuo naw sien;

Huonga ranruol inlawi naw sienkhawm,

Ka lawm pei ding si a Lalpaa chun.

Berâmpu ṭha Lal Isu chu,

Hratnawhai ṭhangpuitu a nih;

A hnungzuituhai phatsan ngai lo,

Hmaṭhuoitu le nghilnei zâidam anih.

LAL ISU KA NEI TAH

Doh is Eb                                Lalsangawi

Lal Isu ka nei china chun lampui chin hraw ka lo nih,

Ka nuom zawng thilhai thaw chu a rem ta nawh;

Ka chantawk a lungawiin harsain rinum sienkhawm,

A ditzawnga um dingin Lal Isu’n a mi nghak zing.

Ka hringnun hi aw a bo pha chun,

Ka thlantu hmel mawi ditum chu hmung ka ta;

A chun ka hnuoi mitthli mi lo hrufai pêk a ta,

Ropui takin leng ka tih, Lal Isu ka nei ta si.

Hnuoi hausakna inlalna le ropuina nei naw langkhawm,

Lal Isu nei ka tadi’n a hun tawk ie;

A hmelsiet ding ka phal naw, a hming chuoi ding ka phal nawh,

Ka iengkima iengkim chu Lal Isu chau hi a nih.

A harsa ngei khawvêl hi chu lungawina reng a um nawh,

Insanglemna beiseiin hmun a sip zo;

Ieng dinga ka buoi hlak am iengdinga ka lungngai am,

Lungawina him Lal Isu ka ro chan hlu a ni si.

HUNG RO HUNG RO

Doh is G                      H P Runremthang

Tiena inthawk chanchin ṭha ei dawng,

Hmangaina le inremnain ro ei rela;

Sienkhawm Lalpa maicham a chim zo tah,

Thaw ro, Lalpa maicham chi siemthar nawk ei tiu.

Hung ro, hung ro, Lalpa kuomah,

Hung ro, lalpa kuomah kir ei tiu;

Mi lo keinawi ta sienlakhawm,

A mi sukdam  nawk ding a nih,

Mi lo sukna ta sienlakhawm,

A mi tuom nawk ding a ni si.

Tu lai ṭhangthar nun ṭhalaihai hin,

Khawvel tar nenetui umlo chu an fawp a;

Khawpna umlo, beidawngna chau a nih,

Hung unla Krista hringna tui chu dawn ei tiu.

Ei ram le ei hnam humhimna di’n,

Chengrang chawia doral ropui rel a ngai nawh;

Ei ralthuom chu Gospel chau hi a nih,

Chu ngei chu ei inhumhimna di’n hmang ei tiu.

Hlunlo ram thlirin ei buoi zo tah,

Ei sakhmela hai khawm lawman a um ta nawh;

Lalpaa ei lawman chu ei hratna,

Chungtieng thlir ei ta, hluo senglo ram a la tam.

Muvanlai iengin ringtu nun hi,

Ei hlimthla chu hnuoiah inleng vel sienklahawm;

Ei hringna chu vansnaga leng a nih,

Suol sukhlum thei lovin Lalpa’n a mi dawmsang.

VAKVAI LE FEHMANG MEK HAI

Doh is D                                  T Romana

Aw vân Thlarau Thineghlim hung leng nawk la,

Mi umpuia mi veng hlaktu kha;

Lungsietna rawl lo hnawl hlak in la khawm,

Suol tuipuia ka pil miphal naw rawh.

Vakvai le fehmang mekhai,

 Hnena puongsuok theilo hliem tuor mekhai;

 Ṭhuoi kirin kan sukdam zo si nawh,

  Sûnni’n tawi a harsa ngei I ṭhang naw chun.

Vân hmangaina pâr tlana leng hnung khawm,

Suol leiin ka lo inrum nawk hlak;

Sienkhawm I kuomtieng hung thlir pei ka tih,

Hratna tharin Lalpa min thuom pei rawh.

Kohran hai hi sininrim inla khawm,

Nangin I ditzawng min chuktir la;

Lam indik hraw a kan inngai sung hin,

Ringna mitin min hmufie tir pei rawh.

Aw nang chatuon lalpa I ṭhangnaw chun,

Hi hnuoi rosum le iengkim hin;

Ropuina le umzie reng a nei nawh,

Kan hratna le lawman I lo ni ie.

KA IENGKIMA IENGKIM

Doh is C                                              H P Runremthang

Khawmvela hin inrieng thlavaiin kan ngaia,

Pasie le saruok el nia kan ngai laiin;

Ka suol leia Lalpa tuorna ka hang thlir chun,

Hrilngam ruol an naw ie aw a tuorna nat zie sawh.

Ka iengkima iengkim I lo ni Lalpa,

Ka chung le hnuoi tienga I min huol vela;

Ka vawi le changa hin nang I lo um si,

Ka iengkima iengkim I l ni Lalpa.

Ka hnuoitieng ka enin, ranthlengah I zalah,

Ka chungtieng ka en le, I Lalthungpha ka hmu;

Ka sirtieng ka enin, I tuorna ka hmu a,

Ka hmatieng ka thlir le, beiseina varmawi ka hmu.

Lalpa tuorna khela tuor tukhawm an um nawh,

A Ropuina chunga ropui an um bawk nawh;

Nagma leia kan hamthatna hi aw Lalpa,

Ka ngaituo chang hin aw, hlim zai vawr naw thei kan nawh.